رۆندک: December 2004

Friday, December 24, 2004

پیرۆزبایی

ساڵی 2005 له هه‌موان پیرۆز بێ، ساڵا 2005 ژهه‌میان پیرۆز به
له ئێوه‌ش، له‌نگۆش، ژوه‌ڕاژی
له ئێمه‌ش، له‌مه‌ش، ژمه‌ڕاژی
له هه‌موان، له هه‌موومان، ژ هه‌میان

هه‌موو
ساڵێ
به خۆشی
د د د د د د د د د

Tuesday, December 21, 2004

بۆ هه‌موو ئه‌و به‌ڕێزانه‌ی كه به‌و بڵاگه‌دا گوزه‌ر ده‌كه‌ن

له‌وانه‌یه جیاوازیێكی بنه‌ڕه‌تی هه‌بێ له نێوان ئه‌و بڵاگه‌ی خۆم ‌و زۆرێك له‌و بڵاگانه‌ی كه زیاتر شه‌وچه‌ره‌و قسه‌ی نه‌سته‌ق و زۆرجاران زیاتر كات به‌سه‌ربردن و شتی له‌و بابه‌تانه بێ.

به‌داخه‌وه من نه كارامه‌م له‌و شێوه گاڵته‌جاڕیه‌و نه له قسه‌ی نه‌سته‌ق و نه كاتیشم زۆره كه له‌و بگره‌وبێنه‌یه به‌سه‌ری به‌رم. بۆیه‌ش كه سه‌ر به هه‌ندێك له‌و بڵاگانه‌دا ده‌كه‌م، له‌سه‌ر قسه‌یه‌كی نه‌سته‌ق یا هه‌ندێ جار له‌سه‌ر قسه‌یه‌كی قۆڕ زیاتر له ده یا پانزه‌و زیاتریش وه‌ڵام و كۆممێنتی جۆراوجۆر ده‌بینم، خۆ ئه‌گه‌ر خاوه‌نی بڵاگه‌كه نه‌خوازه‌ڵا جینسی ناعیم بێ ئه‌وه هه‌ر مه‌پرسه گۆڕه‌پانه‌كه‌ی چه‌ند قه‌ڵه‌باڵغ ده‌بێ. به‌ڵام به‌داخی گرانه‌وه خه‌ڵكی جیددی و به‌دوای پرسیاری جیددی و وه‌ڵامی جیددیدا بگه‌ڕێ نه‌ك هه‌ر كه‌من وه‌خته بڵێم زۆریش ده‌گمه‌نن و كه‌م وایه له‌و بڵاگانه شتی جیددی بوڕوژێنرێ.

من له‌و ئه‌زموونه‌ی خۆمدا پێشتر له‌گه‌ڵ بڵاگی ڤه‌ژین و ئێستاش لێره، زۆر ده‌گمه‌ن وابووه كه‌سانێك بێن كۆممێنت بنوسن له‌سه‌ر ئه‌و بابه‌تانه‌ی كه ده‌وروژێنرێن. ده‌مگووت له‌وانه‌یه شته‌كانی من تا ڕادده‌یه‌ك هزرو ڕاوبۆچوونی كه‌سێتی خۆم بن و خه‌ڵكیش له‌گه‌ڵ ئه‌و شێوه نوسینانه زۆر زه‌وقیان نه‌بێ، به‌ڵام گه‌یشتوومه‌ته نیمچه قه‌ناعه‌تێك كه هه‌موو ئه‌و بڵاگانه‌ی شت ده‌وروژێنن و پرسی جیددی تێدا بڵاوده‌كرێنه‌وه میوان و ڕێبواریشیان كه‌من. یه‌كێك له‌و نمونانه (بڵاگی ڕوانین)ه به هاوكاری كۆمه‌ڵێك براده‌ر ده‌یه‌وێ شتی جیددی بوڕوژێنێ و قسه له كۆمه‌ڵێك پرس بكات، به‌ڵام تا ئێستا كۆممێنتی كه‌سێكی غه‌یری خۆیانم نه‌بینیوه، ئه‌مه‌ش به ڕاستی جێگای داخه. ئه‌و دیارده‌یه‌ش ڕۆژ به ڕۆژ به‌ره‌و ئه‌و قه‌ناعه‌ته‌م ده‌بات كه له‌مه‌ودا زۆر ببڕای ببڕای نه‌بێ سه‌ر به بڵاگه‌كاندا نه‌كه‌م، هی خۆشم هه‌روا به‌ره‌و سستی ببه‌م.

هیوادارم له‌سه‌ر وڕوژاندنی ئه‌و پرسه كۆمێنتم بۆ بێن و ببێته جێی قسه‌و باس.
ئه‌مه‌ی خواره‌وه‌ش بڵاگی ڕوانینه

http://www.rwanin.blogspot.com/

Friday, December 17, 2004

نوزانه‌وه‌ی فتیلی چراكان


فتیله‌كان
ده‌به‌ریه‌كڕاچوونی ئه‌و تارماییانه‌ن كه ده‌یانه‌وێ بێره‌دا تێپه‌ڕببن
ئه‌و هه‌وره تریشقانه‌ن كه ده‌نگی هه‌راساندن و بریقه‌ی هه‌زاران ده‌نكه شقارته‌یان پێیه
ئه‌وه منم ده‌مه‌وێ نه‌ڕۆم و لێره‌ش نه‌مێنم
تا فتیله‌كان ده‌رفه‌تی هه‌ناسه‌یه‌كی تریان پێده‌درێ
ئه‌وه منم فتیله‌كانم هان ده‌دا
ماسكی سه‌ر ڕووی پاڵه‌وانه فشه‌كان هه‌ڵماڵێ
له‌شكری تاریكی ده‌ڤه‌ره‌كانی دڵی وڵاته‌كه‌م
بۆ فانۆسه سیحریه‌كانی پاڵه‌وانه به درۆكان بگێڕێته‌وه
نوزانه‌وه‌ی فتیله‌كان بوو
هانیان ده‌دام هانیان بده‌م
هانیان ده‌دام به پاڵه‌وانه درۆزنه‌كان بڵێم
ده‌بڕۆن به زێدی ئه‌و وشانه‌دا گوزه‌ر بكه‌ن و هه‌موو به‌خته ڕژاوه‌كان بۆخۆتان هه‌ڵبگرنه‌وه
له‌وێ به‌رامبه‌ر ئاوێنه‌ی ته‌مه‌نی بابردوتان گۆرانی بڵێن و ئومێدی ته‌نها ڕۆژێك ژیان كۆبكه‌نه‌وه
ئه‌وه منم زه‌مه‌نێكه كڵاوه با بردوه‌كانتان له مۆزه‌خانه‌ی دوا یادگاری یه‌كیك له گه‌وره‌ترین به‌زینه‌كانتان ده‌نژنم
غروره‌كانتان به‌و شمشێره شكاوانه‌ی كه شه‌ڕی براكانتان پێده‌كرد ده‌هه‌نجنم و دیرۆكی زاوانه‌بوونتان بۆ هه‌موو قه‌ده‌ره‌كان ده‌گێڕمه‌وه
ئه‌وه‌منم به شه‌ره‌فی ڕژاوتان تێنوه‌تی ئه‌سپه‌كانتان ده‌شكێنم و به دوا پاشۆڵی دڕاوتان خه‌زانی هه‌میشه وه‌ریوتان كۆده‌كه‌مه‌وه
نوزانه‌وه‌ی فتیلی چراكان
زمانێكی تازه‌یه
باراندنی نه‌فره‌ته
بۆ هه‌موو ئه‌و ساتانه‌ی ئێوه‌ی تیادا غافڵ ده‌بن
بۆ هه‌موو ئه‌و دیرۆكانه‌ی ئێوه‌ی تیادا چاوشۆڕ ده‌بن
بۆ هه‌موو ئه‌و ڕاگه‌یاندنانه‌ی كه به بزمككراوی له‌سه‌ر مینبه‌ره‌كان بێ هونه‌ر ده‌بن
بۆ ئه‌و سه‌ره‌تایانه‌ی ئێوه دروستی ده‌كه‌ن و ئه‌و كۆتاییانه‌ش كه ئه‌وانی دی به‌رهه‌می ده‌هێنن
ئه‌وه نوزانه‌وه‌ی فتیلی چراكانه
گوێی له چرپه‌ی هه‌موو ئه‌و ده‌سبازیانه‌یه كه له‌سه‌ر دووگوردی هوبه‌له‌كان ئه‌نجامی ده‌ده‌ن
هه‌موو ئه‌و شه‌وبه‌راتانه ئاماده‌یه كه ئێوه به چامانه‌كه‌ی سه‌رتان په‌رده‌تان بۆ په‌نجه‌ره‌ی شه‌وه‌سووره‌كان هه‌ڵده‌دا
ئه‌وه منم
فتیله‌كانتان لێ هانده‌ده‌م
سۆزانیه‌كانتان لێ بتۆرێنن
ساخته‌ی تۆزی نیشتووی سه‌ر ڕووتان
تفباران بكه‌ن و
ڕیسی چنراوی هه‌موو ئه‌و ڕێگا دوورو درێژه‌تان بكه‌نه‌وه به خوری و
بۆ دواجار ئاشبه‌تاڵی به درۆكانتان بكه‌ن
ئه‌وه منم
له‌وه‌تی هه‌م فتیله‌كانتان لێ هانده‌ده‌م

Wednesday, December 15, 2004

بزانین له كوێی ئه‌و دونیا بچوكه داین

ئه‌گه‌ر ئه‌و جیهانه به هه‌موو نه‌ته‌وه‌و خه‌ڵكی سه‌ر زه‌وی به‌رامبه‌ر بكه‌ین له‌گه‌ڵ گوندێكی بچكۆڵه كه دانیشتوانی 100 كه‌س بن، ئه‌وا ئه‌و گونده له‌و كه‌سانه پێك دێ:
· 57 ئاسیایی، 21 ئه‌وروپایی، 14 ئه‌مه‌ریكایی (باكوورو باشوور)، له‌گه‌ڵ 8 ئه‌فریقایی.
· 57 ژن و 48 پیاو.
· 70 كه‌سی ڕه‌نگی هه‌مه جۆر و 30 ڕه‌نگ سپی.
· 30 كریستیان‌ و 70 كه‌سی نا كریستیان.
· 89 كه‌سی ئاسایی و 11 هۆمۆ.
· 6 كه‌س 59% جیهانی پێشكه‌وتوو پێكدێنن.
· 6 كه‌س خاوه‌نی ڕه‌گه‌زنامه‌ی وڵاته یه‌كگرتووه‌كانن.
· 80 كه‌س بێ خانو و جێگا و ڕێگان.
· 70 كه‌س نه‌خوێنده‌وارن.
· 50 كه‌س پشت به غه‌یری خۆی ده‌به‌ستی.
· 1 كه‌س ده‌مرێ.
· 2 كه‌س له دایك ده‌بن.
· 1 كه‌س كۆمپوته‌رێكی ده‌بێ.
· 1 كه‌س دیبلۆمێكی هه‌بێ.

هه‌ركاتێك به‌و شێوه‌یه ته‌ماشای جیهان بكه‌ین ده‌بینین یه‌كترقبولكردن و خوێندن گرنگترین ده‌سته‌واژه‌ن بۆ جیهانێكی باشترو پێشكه‌وتووتر.
ئه‌گه‌ر تۆ ئه‌و به‌یانیه به ته‌ندروستیه‌كی ته‌واو له‌خه‌و هه‌ڵسایت، ئه‌وا تۆ به دڵنیاییه‌وه باشتری له یه‌ك ملیۆن كه‌سی كه له ڕۆژانی داهاتوودا له‌به‌ر نه‌خۆشی له به‌ین ده‌چن.
ئه‌گه‌ر تۆ هه‌رگیز دووچاری جه‌نگ و دابڕان و برسیه‌تی و برینداری نه‌بووبی له ئه‌نجامی شه‌ڕو كوشتار ئه‌وا تۆ له 500 ملیۆن كه‌سی ئه‌و جیهانه باشتری.
ئه‌گه‌ر تۆ بتوانی بچیته كڵێسایه‌ك یان هه‌ر په‌رستگایه‌كی تر بێ ئه‌وه‌ی هه‌ست به مه‌ترسی هه‌ڕه‌شه لێكردن بكه‌ی، یا بگیرێی یا ئه‌شكه‌نجه بدرێی یا بكوژرێی، ئه‌وا تۆ له 3 میلیارد كه‌س خۆشبه‌خت تری.
ئه‌گه‌ر تۆ توانای دانانی خواردنت هه‌بێ له یه‌خچاڵ، بتوانی جل و به‌رگ له‌به‌ر بكه‌یت، خانووت هه‌بێت، جێگایێكی خه‌وتنی ئاسووده‌ت هه‌بێ ئه‌وا تۆ له 75% دانیشتوانی سه‌ر ئه‌و زه‌ویه ده‌وڵه‌مه‌ند تری.
ئه‌گه‌ر تۆ ژماره‌ی بانكی خۆت هه‌بێ، یا هه‌ندێ پاره‌ی كاشت له جزدانه‌كه‌تدا هه‌بێ، یا هه‌ندێ پاره‌ت له سندوقێك دانابێ، ئه‌وا تۆ یه‌كێكی له 8% ده‌وڵه‌مه‌نده‌كانی سه‌ر زه‌وی.

له ماڵپه‌ڕێكی هۆڵه‌ندی وه‌رگیراوه

Monday, December 13, 2004

مه‌ڕۆ بۆ باکوری عیراق !

ئه‌م نامه‌یه‌ی خواره‌وه ئه‌مڕۆ له هێمن عبدالله‌وه گه‌یشته ده‌ستم، منیش لێره وه‌كو خۆی به خۆشیه‌وه بڵاوی ده‌كه‌مه‌وه.
ماوه‌یه‌ک پێش ئێستا ئێرانییه‌کان هێرشێکی ئه‌له‌کترۆنییان کرده‌ سه‌ر وشه‌ی ( که‌نداوی عه‌ره‌بی) له‌ ماشێنی گه‌ڕانی گوگڵ دا ، ئه‌ویش به‌ چێکردنی لینکێک به‌و ناوه‌وه‌ که‌ هه‌موو وێب و وێبلاگه‌کانیان دایاننا و ئه‌وه‌نده‌ کلیکیان له‌سه‌رکرد که‌ به‌ قه‌ولی خۆیان که‌نداو بووه‌وه‌ به‌ فارسی !! ..

ئێستا کوردیش خه‌ریکی هێرشێکی له‌وجۆره‌ن بۆ سه‌ر وشه‌ی ناقۆڵای ( باکوری عیراق ) ، که‌ بێگومان مه‌به‌ست لێی باشوری کوردستانه‌ و ڕۆژانه‌ له‌ مێدیای جیهانیدا دوباره‌ ده‌بێته‌وه‌ .

هێنده‌ی من ئاگاداربم بلاگنووسی کورد بۆمبه‌که‌یان چێکردووه‌ و چاوه‌ڕوانیی ئه‌وه‌شیان نییه‌ که‌س پاداشتیان بداته‌وه‌ ، ته‌نها شتێک که‌ ده‌یانه‌وێت کلیک کردنێکی ساده‌وساکاره‌ له‌سه‌ر لینکی باکوری عیراق ، هه‌رچه‌ند زۆرتر کلیک بکه‌یت چاتره‌ !! ..
....


بلۆگی ( هه‌رێمی هیچ ) زۆر جوان لینکی داوه‌ته‌ ئه‌و بۆمبه‌ ئه‌له‌کترۆنییه‌ ، پێشنیار ده‌که‌م شێوازه‌که‌ی ئه‌و بکرێته‌ ستاندارد و هه‌موو وێبلاگ و وێبسایته‌ کوردییه‌کان بێ ده‌ستکاری داینێنه‌وه:‌


ئه‌وه‌ ئه‌ڕۆی بۆ باکوری عیرراق؟
نه‌وه‌ڵا ئه‌ڕۆم بۆ باکوری عیراق
ده‌وه‌ڵلا وامزانی ئه‌چی بۆ باکوری عیراق!


http://www.northerniraq.info

Friday, December 10, 2004

باوه‌ڕهێنان به بزمار

میلله‌تێك نه‌خوێنێته‌وه ناشتوانێ بیربكاته‌وه، ئه‌گه‌ر بیریش نه‌كاته‌وه ناتوانێ ڕه‌فتاری ڕاست و دروست و به كه‌ڵك و به فه‌ڕیش بنوێنێ. بۆیه "من بیرده‌كه‌مه‌وه كه‌واته من هه‌م" ئه‌و هوشیاریه‌یه كه هه‌موو ئینسانێك له ئاكامی بیركردنه‌وه‌دا دوڕیانه‌كانی ڕاست و چه‌وتی بۆ ڕوون ده‌بنه‌وه، ئه‌گه‌ر ڕاسته‌وخۆش نه‌بێ دواتر ڕاستیه‌كان ده‌رك ده‌كات.
باوه‌ڕبوون به بزمار كوتان له قاپی دارێك، بینینی له‌زه‌ته له ئازاردانی بوونێك ئه‌گه‌ربه مه‌به‌ستیش نه‌بێ. بوونی قه‌ناعه‌تێكه له وه‌هم و خورافه به‌ده‌ر به‌رهه‌مێكی تری لێ نادورێته‌وه. ئاكامی بوونی ئه‌و دۆگما ناشیرینانه‌یه كه هه‌موو مێشكی خه‌ڵكی داپۆشیوه‌و په‌رده داپۆشیوه‌كانیش ژه‌نگخواردوو بوون و تا ئه‌و بزماره له قاپی داره به‌سته‌زمانه‌كه هه‌ڵنه‌كه‌نین و له مێشكی هه‌واداری ئه‌و بزماره و ئه‌و بیروباوه‌ڕه نه‌ده‌ین هوشیار نابێته‌وه‌و خۆی نادۆزێته‌وه.
ئاخر ئومێدی چمان به گه‌نجێك بێ كه پێی وایه ئه‌و بزماره له‌و داره بكوتێ ئێش و ئازاری ددانی ده‌ڕواو نامێنێ. هه‌ر ئه‌و گه‌نجه‌ش بوو تا دوێنێ تفه‌نگ له شان بوو سه‌روه‌ری و به‌رژه‌وه‌ندی یه‌كێك له حیزبه شه‌ڕڤانه‌كانی ده‌پاراست.
خۆ زۆر شتی تریش هه‌ن وه‌كو بزمار ئاگاشیان له خۆ نیه ده‌شپه‌رسترێن.
ئه‌ی وه‌هم خۆزگا هه‌ر جارێك، ته‌نها جارێك ده‌ستم پێت ڕاده‌گه‌یه‌شت، به‌ڵێن بێ ده‌مگرتی و هه‌لا به هه‌لام ده‌كردی، هه‌پرون به هه‌پرونم ده‌كردی، وردو هه‌راشم ده‌كردی، په‌ل په‌لم ده‌كردی، پارچه پارچه‌م ده‌كردی، ده‌مكردی به تریته، ده‌مپروچاندیه‌وه، ده‌مكردی به ڕیتك، ده‌مكردی به جیق، وه‌كو ده‌ستونوێژ ده‌مشكاندی، هه‌ر پارچه‌یه‌كیشم بۆ وه‌همخانه‌یه‌ك ده‌بردی. ئه‌وجار چ ده‌بوو با ببێ.
ـــــــــــــــــــــــــــــــــــــــــــــــــــ
تێبینی: ئه‌م بزمار له داركوتانه به‌شێكی به‌رنامه‌ی پشووی هه‌فته بوو ئێواره‌ی ئه‌مڕۆ هه‌ینی 10/12/04 په‌خش كرا. له گوندی داره بزمار ئه‌وه‌ی ددانی بێشێت، ده‌چێته ئه‌و گونده‌و بزمارێك له‌و داره ده‌كوتێت. هه‌ندێك خه‌ڵكی خێرومه‌ندیش به‌رده‌وام بزمار ده‌به‌ن له تاقه دوكانی ئه‌و گونده بۆ خێروخێرات دایده‌نێن.

Tuesday, December 07, 2004

دڵنه‌وایی بۆ شه‌هیدانی كیمیاباران

ئه‌مڕۆ له هۆڵه‌ندا ڕاگه‌یه‌نرا كه (فرانس فان ئانرات)ی به ڕه‌گه‌ز هۆڵه‌ندی دوێنێ له ئه‌مسته‌ردام ده‌سگیركراوه.
ده‌زانن ئه‌و به‌دعه‌مه‌له كێیه؟
ئه‌و تاوانباره له دیدارێكدا له‌گه‌ڵ كه‌ناڵی دووی هۆڵه‌ندا حاشای له فرۆشتنی ئه‌و گازه ژه‌هراویانه نه‌كرد. به‌ڵام حاشای له‌وه ده‌كرد كه نه‌یزانیبێ ئه‌ گازانه بۆ چ به‌كارهێنراون. تا ڕۆژنامه‌وانه‌كه ڕه‌دی دایه‌وه‌ و گوتی: چۆن نه‌تده‌زانی؟ ئه‌ی نه‌تده‌زانی ئه‌و گازانه بنچینه‌ی پێكهاته‌ی هه‌مان ئه‌و گازه ژه‌هراویانه‌ن كه عیراق دژی كورد به‌كاری هێناون؟ ئینجا زمانی تێكئاڵاو، كه‌وته شه‌په‌ شه‌پ.
ڕاستی ئه‌و ڕاپۆرته‌ی ئه‌و ته‌له‌فزیۆنه پێشكه‌شی كرد زۆر كاریگه‌ر بوو، هێنده كاری لێكردم وامده‌زانی ئه‌مڕۆ ئه‌و كاره‌ساته ڕوویداوه.
ئه‌مه‌ش به‌شێكه له به‌دڕه‌وشتی ئه‌و خاوه‌ن سه‌رمایانه‌ی كه بێ گوێدانه ڕه‌وشت ته‌نها هه‌ڵپه‌ی قازانجیانه.
به‌وئومێده‌ی ئه‌وه‌ی هه‌موو تاوانباران و بكه‌رانی باراندنی گازی كیمیاوی به‌سه‌ر دارو به‌ردو ده‌شت و دۆڵ و شاخه‌كانی كوردستاندا ڕووڕه‌ش ببن و قوربانیه‌كانیش هه‌نسكی ئۆخه‌ی ئاسووده‌یی هه‌ڵبكێشن.

Friday, December 03, 2004

خه‌‌بات به بێ توندوتیژی

باپیره‌م تا سه‌ر ئێسقان ڕقی له‌چه‌ك ده‌بووه‌وه، به تایبه‌تیش ئه‌گه‌ر هه‌ڵگرانی چه‌ك خه‌ڵكی ڕه‌وه‌جه‌ل ‌و ناڕۆشنبیر بان. ده‌یگووت: چه‌ك ئه‌خلاق‌ و عه‌قلی له دواوه نه‌بێ خۆی خۆی بۆ فه‌نا ده‌بات. بۆیه كه ته‌ماشای ده‌یان ساڵی خه‌باتی خه‌ڵكی كورد ده‌كه‌ین، له كوشتن به دواوه هیچی ترمان نه‌بینی. كه له چیاكان دابه‌زین، ئه‌و هه‌موو ساڵانه‌ی خه‌بات ‌و كوێره‌وه‌ری ‌و جه‌نگ هیچی لێ زیاد نه‌كردبوون، جگه له یه‌ك شت، ئه‌و‌یش ته‌نها ناو بوو.
"پێشمه‌رگه"

من پێشان ‌و هه‌نوكه‌ش پێشمه‌رگه‌م خۆش ده‌وێت، چونكه ئه‌و كه‌سه‌ی ڕه‌زیلی به گیان و به ئاسووده‌یی خۆی نه‌كات بۆ گه‌له‌كه‌ی ڕه‌زیلی به هیچ شتێك ناكات. بۆیه ده‌مه‌وێ بڵێم من مه‌به‌ستم پێشمه‌رگه‌ی ئاسایی نیه، ئه‌و كه‌سانه نین كه ئاره‌قیان ڕشتووه یا خوێن. به‌ڵكو مه‌به‌ستم هه‌موو ئه‌و كه‌سه ده‌سه‌ڵاتدارانه‌یه كه سه‌ركردایه‌تی پێشمه‌رگه‌یان ده‌كرد، به ناوی شۆرش. به‌ڵام تا ئه‌و چركه ساته‌ش شۆڕشمان نه‌بینیوه. هه‌روه‌كو ڕوخانی به‌عسمان بینی به‌ڵام به‌عسیزم له هه‌موو مرۆڤه‌كان، له سیستمه‌كانمان، له دارو به‌ردی وڵاته‌كه‌شمان ئاهو نه‌فه‌سێكی ماوه ‌و هه‌یه

بۆیه هێنده شه‌ڕمان كرد، نه‌گه‌یشتین به هیچ. هێنده قوربانیماندا، هیچمان نه‌دووریه‌وه. چونكه چه‌ك به‌ته‌نها بۆ هیچ كوێیه‌‌كی نه‌بردین
ماندێلا شۆڕشی كرد، زیاتر له بیست ساڵ له گرتوخانه ژیانی برده سه‌ر، نه بێهێز بوو، نه سه‌ری دانه‌واند بۆ كه‌مایه‌تی ڕه‌گه‌زپه‌رست، نه گله‌ییشی له خه‌ڵكه‌كه‌ی كردو پێیان بڵێ: من هه‌موو جه‌وانی خۆم له گرتووخانه بۆ خاتری ئێوه به‌سه‌ر برد، بۆیه ده‌بێ منیش سه‌رۆكتان بم تا هه‌تا هه‌تایه. نه پێنج ملیار و نیویشی بۆخۆی گلداوه‌ته‌وه له پاداشتی ئه‌و هه‌موو ساڵانه‌ی خه‌بات، وه‌كو عه‌ره‌فات

ئه‌وه‌ی خه‌بات ده‌كات، له هه‌ست كردن به‌وه‌ی كه په‌رپرسیاریه‌تی له‌سه‌ر شانه‌و ده‌بێ ئه‌نجامی بدات، بڕیاری خه‌بات ده‌دات، هه‌روه‌كو هه‌موو ئه‌ندامێكی كۆمه‌ڵگا هه‌مان ئه‌ركیان له‌سه‌ر شانه‌و ده‌بێ ئه‌نجامی بده‌ن. بۆیه ناكرێ گله‌یی و پنده‌پند له‌خه‌ڵكی تر بكرێ، به بیانۆی ئه‌وه‌ی ئه‌وان هیچیان نه‌كردووه. چونكه بێجگه له‌وا‌نه‌ی كه به خیانه‌ت خه‌ڵكیان ئه‌زیه‌ت داوه، بێجگه له‌وانه پێم وایه هه‌موو تاكێك به پێی توانا دڵسۆزی خۆی نواندووه. هه‌ریه‌كه‌و به شێوازێك.
ئه‌ی نازانن زیاتر له سی ساڵ له دژی سه‌ددام جه‌نگاین، به‌ڵام به‌قه‌د یه‌ك حه‌فته‌ی كۆبوونه‌وه‌و پڕۆته‌ستۆی جه‌ماوه‌ری ئۆكرانیا به‌رهه‌می نه‌بووه. دوای ئه‌و هه‌موو خوێنه له ئاكامدا هه‌ر ئه‌مه‌ریكا و بابا بۆش توانی سه‌ددام لابدات
ده‌زانن بۆ؟
به ڕای من ته‌نها له‌به‌ر یه‌ك هۆ
چونكه كه‌سێكمان نه‌بوو له سه‌ددام جیاواز بووبێ و شه‌ڕیشی له‌گه‌ڵ كردبێ
بمرێ چه‌ك بژی عه‌قل‌
بمرێ ژێرده‌ستی، بژی ئازادی

ئه‌ی به ڕای ئێوه‌ش هه‌ر وانیه؟