پرسی دوو دیمه‌نی جیاواز

له‌ هاوینی ڕابردوودا سه‌فه‌رێكمان بۆ پیره وه‌ڵات كرد، كوڕێكی پێنج ساڵ‌و نیومان هه‌یه‌و له هۆڵه‌ندا له دایك بووه. به‌ر له‌وه‌ی سه‌فه‌ر بكه‌ین، هه‌ر دیمه‌نێكی جوانی بدیبایه به دڵنیاییه‌وه ده‌یگوت

بابه ئه‌وه كوردستانه
كه چوینه‌وه بۆ وڵات‌و تێر گه‌رما بووین‌و دونیایه‌ك تۆزی پیرۆزی بێنازی وڵاته‌كه‌مان هه‌ڵمشت‌، شوتی‌و كاڵه‌ك (گندۆره‌و) و هه‌نجیرو ترێ‌و خیارو ته‌رۆزیمان خوارد

زێده‌ڕۆییش نیه ئه‌گه‌ر بڵێم هه‌رچی جاده‌و ڕێگاو بانی ئه‌و وڵاته هه‌یه هه‌مووی له ژێر كاركردن‌دا بوو، به‌ڵام زۆریان هه‌ڵوه‌شێنرابوون‌و به هه‌ڵوه‌شاوه‌ی وازیان لێهێنرابوو، پێده‌چوو زه‌مه‌نێك بێ هه‌ر ئاوا وازیان لێهێنرا بێ

ئه‌و دیمه‌نه تۆزاوی‌و كۆسپ‌و خه‌نده‌ك‌و ڕێگاوبانه هه‌ڵوه‌شاوانه جێگای هه‌موو دیمه‌نه جوانه‌كانیان له دیدی هۆشڤانی مناڵ داگیر كردبوو

كه گه‌ڕاینه‌وه بۆ هۆڵه‌ندا ئه‌و شه‌قامه‌ی به به‌ر مه‌كته‌به‌كه‌ی سه‌ره‌تایی هۆشڤان‌دا تێده‌په‌ڕێ، له ژێر كاركردن‌دا بوو، بندۆزه‌رو ماشێنی هه‌مه‌جۆر كاریان تێدا ده‌كرد. خه‌نده‌كی گه‌وره‌یان لێدابوو، خۆڵی زۆریان هه‌ڵدابووه‌وه. هه‌ركه له دووره‌وه هۆشڤان چاوی به‌و دیمه‌نانه كه‌وت كه‌وته قسه‌و پرسی

بابه ئێره‌ كوردستانه؟