ده‌به‌ر یه‌كڕاچوونێك

كه وشه ده‌ست ده‌كه‌ن به گریان، كه‌س گوێی لێیان نابێت، ئه‌وان ده‌گرین بۆ ئه‌وه‌ی ماناكان به قسه بێنن. گریانی وان ئه‌و كاتانه ده‌بێ كه گوێیان لێناگیرێ، گریانیان نزایێكی ئه‌به‌دیه‌و هێزی روحێكی تازه‌ن بۆ جموجۆڵی دیرۆكی مانایه‌كان. كه ئێمه‌ش ده‌گرین تاكه پانتاییه‌ك كه جێگای گریانی ئێمه‌ی تیادا ببێته‌وه باوه‌شی وشه‌كانه، هه‌ر ئه‌وانن ته‌عبیر له مانای گریانه‌كانمان ده‌كه‌ن. ئه‌وان نه‌بوان ده‌بوایه ئێمه به شێت بوون ته‌عبیر له خۆمان بكه‌ین. ئه‌گه‌ر گریانی ئێمه‌ش نه‌بوایه ده‌بوایه ئه‌وان بێ دیرۆك بوان. ئه‌وان له گریانی ئێمه‌وه سه‌رچاوه ده‌گرن‌و ئێمه‌ش له گریانی ئه‌وانه‌وه دیرۆك دروست ده‌كه‌ین. ئێمه‌و ئه‌وان له ده‌ست له‌ملان بوونێكی ئه‌به‌دی داین، هه‌ردوو گریانه‌كانمان له پانتایی مانایه‌كان ئاهه‌نگ ده‌گێڕن.