تێیۆ فان خۆخ؟

ئه‌و ده‌رسانه چی بوون له كوشتنی تێیۆ ڤان خۆخ وه‌رگیران؟
بێ هۆ نه‌گوتراوه: نه‌زانێك به‌ردێك ده‌هاوێته گۆمێك به سه‌د زانا نایه‌ته ده‌ره‌وه. نه‌زانێكیش به تاوانێك هه‌ڵده‌ستێ به‌ڵام ده‌یان تاوانی تری به‌دوادا دێن! لێره‌دا پڕ به پێستی خۆیه‌تی وشه‌ی تیرۆر به‌كار بێنین. ئه‌گه‌ر ئه‌و كه‌سه‌ی تێیۆ ڤان خۆخ ده‌كوژێ تیرۆریست نه‌بێ ئه‌وا نابێ كه‌س تیرۆریست بێ. ئه‌مه‌ش له‌به‌ر هۆیه‌كی زۆر ئاسان، ئه‌ویش: یه‌كێك ماڵی له شوشه بێت نابێ به‌رد له ماڵی خه‌ڵك بگرێ.
ئه‌وه‌ی له‌و ڕۆژانه له هۆڵه‌ندا ڕوو ده‌دا هه‌رگیز جێی دڵخۆشی هیچ كه‌سێكی ئه‌و وڵاته نیه. ئه‌و كوشتنه كۆمه‌ڵێك ده‌رگای فیتنه‌ی كردنه‌وه نه به سه‌رۆك وه‌زیران‌‌ داده‌دخرێ‌و نه به ڕه‌وه‌ندی مسوڵمانیش.
باشه ئه‌ی قورئان ناڵێ: فان اعتدو علیكم فاعتدوا علیه بمثل ما اعتدی علیكم. تێیۆ پیاوێكی گاڵته‌جار بوو، بۆ ئه‌و هه‌موو دینه‌كان له‌یه‌ك ڕێز بوون. زۆر له مێژه به‌زمی خۆی به كریستیانه‌كان كردووه‌و له خۆ بووبووه‌وه، كه‌چی به وشه‌و نوسین‌و ناڕه‌زایی هه‌ندێ كه‌نیسه وه‌ڵامی درایه‌وه. به‌ڵام ئه‌و وه‌ڵامه‌ ئیسلامیه نه‌ك هه‌ر تێیۆی كرده پاڵه‌وان، به‌رهه‌مه‌كه‌شی كرده شاكارێكی مه‌زن‌و تا ئه‌مڕۆ ده‌یه‌ها كۆمپانیای نێوده‌وڵه‌تی داوای كڕینی ئه‌و به‌رهه‌مایان كردووه. به‌ینی خۆمان بێ ئه‌و نسكۆیه خومه‌ینیانه بوو، خومه‌ینی سه‌لمان ڕوشدی ناودار كرد. ئه‌وانه‌ش تێیویان كرده پاڵه‌وانی هونه‌رو به‌رهه‌مه‌كه‌شی بوو به شاكارو خه‌وی هه‌زاران ڕه‌وه‌ندی مسوڵمانیشیان زڕاند.
ده‌بێ ڕاست بێ كه ده‌ڵێن: چۆن ئیسلام 600 ساڵ له دوای مه‌سیح هاتووه، ئه‌وه‌نده‌ش مسوڵمانان له دواوه‌ی ژیاری ڕوژئاواو مۆدێرنێته‌ن؟